أرسلت عشرات الـ CV وما انقبلت بولا وظيفة؟ شوف هالأخطاء الشائعة اللي رصدتها من طلبات التوظيف اليومية، لتعرف منيح ليش ما عم يوظفوك.
1- ايميلك المفروض يكون بأسمك مو kingofnightaboooody@yahoo.com ويفضل يكون على gmail أوجه يعني.
2- ارسل السي في من ايميلك مو ايميل ابن خالتك لاقي اسم الايميل شب والسي في لبنت!
3- فيك تعذب حالك وتكتب كلمتين بنص الايميل متل kindly find the attached على الأقل يعني وعبي حقل الموضوع طبعاً،مو تسفق الايميل فاضي وملحوش فيه السي في كملف مرفق واسم الملف المرفق “مستند جديد” أو الوردة الجورية!
4- تأكد مرتين وتلاتة انك حاطط السي في بالمرفقات مو باعت الايميل فاضي بلا مرقفات، أو باعت المرفق بصيغة مابتفتح وأكيييد أكيد لا تبعت السي في كصورة! اي نعم، حصلت ووصلتني سيفي كملف صورة هي الصفحة المكتوبة.
5- انت مو مضطر تحط صورتك بالسي في، بس إذا كان ولابد ياريت تكون واضحة ورسمية مو صورة سناب شات أو صورتك وانت عم تعرض أزياء وماتكون مشطوطة وممطوطة ومبكسلة ومعتمة.
6- لاتبعت سيفين واحد عربي وواحد انكليزي وتترك الزلمة يقرر ويختار شو بدو يشوف بعات الأقوى وبس.
7- إذا عامل السي في عالوررد ياريت تنتبه عالتنسيق مو كل كلمة بمكان وشي فوق وشي تحت والخط ياصغيير مابينقرا ياكبير آكل الصفحة. ولتفادي المشاكل ابعته pdf، مابتعرف كيف بتنعمل؟ بتلاقيها بخيارات حفظ باسم بالوورد.
8- اذا كاتب السي في بالانكليزي وانت مابتعرف انكليزي فما تحط انه اللغة الانكليزية (fluent) لأنه مبينة اشكرى كذب، ويفضل تستعين بعمو جوجل كمان مرة لتصحح اخطاءك الاملائية والقواعدية، إذا ما قدرت تلاقيلك شخص خبير يساعدك.
9- طبعاً بقا اذا عامل السي في بالعربي ومقدم ع شغل تحرير المفروض تكون صياغة مرتبة وخالية من الاخطاء الاملائية، لأن هي أساسيات بالعمل.
10- لغة السي في المتعارف عليها هي الانكليزي إلا في حال كان إعلان الوظيفة بالعربي أو طالبين وظيفة الها علاقة باللغة العربية أو الصحافة مثلاً.
11-مكان اقامتك ومواليدك مو سر حتى تخبيهم ورقم هويتك وخانتك واسم امك ابوك ودينك وزمرة دمك ولون عيونك مو مهمين ابداً ابداً. هاد شغل مو خطبة وزواج
12- اذا انا مهندس ومقدم عشغل مبيعات مثلا المفروض انه السي في تبعي يكون متواجد فيه عالاقل شغلة وحدة الها علاقة بالمبيعات تخلي الشخص الي عم يقرا السي في يفهم هو ليش ممكن يوظفك كمهندس بالمبيعات. مو الفكرة بس انه انت عامل سي في ستاندرد وعم تبعتوا لكل شي وظايف بالحياة، السي في ممكن يتقولب حسب الشغل المطلوب وخبراتك وشهاداتك بتبرز شي اكتر من شي حسب عشو مقدم وشو مطلوب. فالسي في مستند بيتعدل وبيتحدث ع كل وظيفة ومع كل خبرات جديدة.
13- بعد ماتبعت السي في شيّك ايميلك باستمرار مشان اذا ردت عليك الشركة او طلبت شي ماترد عليها بعد سنتين. ساعتها أكيد بتكون وظفت غيرك.
14- مابعرف صراحة شو الفكرة من أنه تكتب بين شهاداتك ومؤهلاتك انه معك شهادة تمريض وشهادة بقراءة الكف! مو كل شي يلا بشلفوه بالسي في وهنن يشوفوا شو بيلزمهم لما الشركة بتعمل اعلان لوظيفة بيجيها مليييون ايميل ماحدا فاضي يقعد يدقق بسيفيتك ويلخص وياخد الزبدة انت بدك تعطيهم الزبدة والمفيد اذا حابب تشتغل وتتوظف.
للأسف، من 15 سنة وكل المبادرات والجمعيات و و و صرعونا بتدريبات كتابة السي في والتقدم للوظائف و و و ولازال الناس بتعمل هالأخطاء والكوارث.
وهي الملاحظات عم عايشها يومياً .. وتذكر بتقدر تشتغل ع حالك وتظهر مهاراتك وتحصل على شغل بدون سي في ..
وكمان تذكر .. مع الوقت لازم تختصر من السي في لحتى يبقى فيها اسمك وبس.
#السيرة_الذاتية #كتابة_السيرة_الذاتية
سيرة ذاتية,كتاب سيرة ذاتية,سيرة ذاتية بالانجليزي,نموذج سيرة ذاتية,سيرة ذاتية جاهزة,نماذج سيرة ذاتية,سيره ذاتيه,نموذج سيرة ذاتية جاهز للتعبئة pdf,سيرة ذاتية بالعربي,كتابة سيرة ذاتية,